ARUBA.- Federacion di Ajedrez Aruba ta Organisa: Torneo Internacional UMADA CUP

ARUBA - Setiembre 2013

Federacion di Ajedrez Aruba tin e grato placer pa informa pueblo di Aruba y specialmente hungadonan di ajedrez, cu di 9-13 di October venidero lo organisa e torneo internacional UMADA Cup. UMADA kiermen “Amistad” y e torneo aki lo tuma luga den Renaissance Convention Center auspicia pa e organo mas halto di ajedrez, esta Fédération Internationale des Échecs (FIDE), den colaboracion cu Confederación de Ajedrez para las Américas (CCA).

Esaki ta di 4 aña cu e torneo aki ta ser organisa y ta un torneo nobo den Caribe pa promove e ajedrez den e region aki. E añanan anterior el a tuma lugar na Trinidad & Tobago (2010), Barbados (2011), y Suriname (2012) na cual nan Aruba a participa. Mirando e desaroyo positivo di ajedrez na Aruba durante e ultimo añanan, aña pasa Aruba a ser acerca pa CCA pa organisa e UMADA Cup e aña aki.

E torneo ta specificamente pa e asina yama paisnan UMADA cu ta un total di 17 pais. E pais cu organisa e torneo, ta haya un suma di FIDE pa haci esaki y ta cubri gastonan di ticket di 1 hungado di cada un dje paisnan aki, cual mester ta un talento hoben bou di 27 aña (riba 1 di Januari 2013) y e organisacion tambe lo cubri 50% di nan alohamento.

E torneo lo ser hunga den dos seccion: un Seccion Abierto (minimal 10 hungado) y un Seccion Challenger (rating ELO bou di 2100). Banda di esaki, lo tin un Seccion special pa Hubentud U-12. Lo tin un total di $16.000 na premio pa reparti den e Seccionnan Abierto y Challenger, mientras pa e Seccion U-12, e prome 5 posicionnan lo ricibi trofeo.

Pa tur esnan cu ta interesa pa participa na e UMADA Cup 2013, esaki por te Dialuna dia 30 di September. E dia aki ainda lo por inscribi entre 7.00-9.00 pm na Club di Ajedrez situa den Nieuwstraat 11. Inscripcion pa tur hungado Arubano bou di 20 aña ta Afl. 25,= y pa tur otro esaki ta Afl. 50,= Pa esnan cu ta participante di otro pais, esaki lo ta $25 y $50 respectivamente. Esnan cu lo participa den e Seccion special di U-12, e inscripcion lo ta Afl. 10,=

Keda pendiente pa mas informacion di e prome UMADA Cup cu lo ser organisa na Aruba den di dos siman di October proximo.

Fuente: 24ora