ARUBA.- Aruba Chess Challenge 2014 9 – 12 oktober

Schaak-vereniging Aruba ta celebrando su di 68 aña di existencia na November ypa celebra esaki a organisa Aruba Chess Challenge, na Centro di Bario Dakota, di diahuebs 9 te cu diadomingo 12 oktober.

A wordo hunga den 3 categoria; Open Group, Youth Group U-18 y Youth Group U-12. Un total di 90 ahedrezista a participa, representando Alemania, Aruba, Bonaire, Curaçao y Suriname. Gobernador di Aruba, su Excelencia Fredis Refunjol, a bin hasi e prome zet oficial di e torneo internacional aki. Despues Fide Arbiter sr. Auke Teu, e chief arbiter, a duna e señal pa e prome buelta di Open Group y Youth Group U-18 cuminsa.

Open Group:

Den e Open Group a participa un total di 22 ahedrezista, representando Alemania, Aruba, Bonaire, Curacao y Suriname.
Ajedrezistanan cu titulo di FIDE cu a participa den e grupo aki ta WFM Maria Diaz (CUR), CM Romario Sanches (SUR), CM Jose Pesqueira (ARU), CM Octavio Croes (ARU), WCM Tesora Ooft (SUR), WCM Seydi Salim-Moussa (CUR) y WCM Zaily Arbona (ARU).

Siete buelta a wordo hunga, consistiendo 77 partido di ahedrez. Despues di tur e partidonan aki e ganadornan a bira conosi:

Prome lugar: CM Romario Sanches (SUR) 5.5 punto
Segundo lugar: Rainer Stark (GER) 5.5 punto
Tercer lugar: CM Octavio Croes (ARU) 5.0 punto
Cuarto lugar: Frank Lo Kim Lin (SUR) 5.0 punto
Quinto lugar: Quintin van de Seijp (ARU) 4.5 punto

Youth Group U-18:

Den e Youth Group U-18 a participa un total di 23 ahedrezista hubenil, representando Aruba, Curaçao y Suriname.

Ahedrezistanan cu titulo di FIDE cu a participa den e grupo aki ta WCM Annelaine Jacobs (ARU) y WCM Catherine Kaslan (SUR).

Siete buelta a wordo hunga, consistiendo 77 partido di ahedrez. Cada buelta 1 participante tawatin un “bye” (liber y ta haya 1 punto).

Despues di tur e partidonan aki e ganadornan a bira conosi:

Prome lugar: WCM Annelaine Jacobs (ARU) 6.0 punto
Segundo lugar: Mark Bueno (ARU) 5.5 punto
Tercer lugar: WCM Catherine Kaslan 5.5 punto

Best U-16 player: Rohan Pahladsingh (SUR) 5.0 punto
Best U-14 player: Pratul Panchoe (SUR) 4.5 punto

Youth Group U-12:

Den e Youth Group U-12 a participa un total di 45 ahedrezista infantile, representando Aruba, Bonaire, Curacao y Suriname.

Nuebe buelta a wordo hunga, consistiendo di 198 partido di ahedrez. Despues di tur e partidonan aki e ganadornan a bira conosi:

Prome lugar: Imaan Kalidjo (SUR) 9.0 punto
Segundo lugar: Alisha Jaipersaud (SUR) 7.5 punto
Tercer lugar: Victoria Kaslan (SUR) 7.0 punto

Best U-10 player: Ethan Croeze (ARU) 6.0 punto
Best U-8 player: David Irausquin (ARU) 5.0 punto

Remarkabel ta cu Imaan Kalidjo a gana tur su 9 partidonan, asina terminando cu e score perfecto. Un logro hopi grandi!

Despues di 4 dia di ahedrez extensivo, combinacionnan tactico, caranan contento, amistadnan nobo, diferente snacks y cuminda dushi, cormento di hotel pa e sala di wega y bek, intercambia ideanan cu otro, un gran cantidad di schaakmat bunita y entregamento di diferente premio, Aruba Chess Challenge 2014 a yega su final diadomingo anochi, dia 12 oktober.

Chief arbiter sr. Auke Treu y (SUR) assistant arbiter sr. Maurits Dijkhoff (ARU) a hasi un bon trabou percurando pa tur e partidonan a wordo hunga segun e reglanan di torneo, den un ambiente competitivo pero hopi sportif.

Directiva di Federashon di Ajedrez di Aruba ta gradici Comision di Subsidio, Lotto pa Deporte, Aruba Tropical Bottling Company, Andina Ice Tropical, IBISA, Centro di Bario Dakota, Stichting Verstandelijk Gehandicapten, Jones Publicidad, Paradera Party Center, famianan Pesqueira, Robert, Werleman, Sleur y Williams, pa nan aporte na e torneo di ahedrez internacional aki por a bira un exito.

Tambe un palabra di danki na tur e participantenan y un gran pabien na tur e ganadornan.

Fuente: 24ora